Fakte, mi estas tute malkontenta pri la antaŭa traduko, kaj apenaŭ kredas ke mi kreis ĝin. Jen la rezulto de meznokta laboro. Kion vi opinias pri la redaktita versio?

La frazo estas tute bona. Pli trafa traduko de la anglaĵo estus tamen frazo kun "fari", ne "agi".

Mi havas malsaman opinion. Certe "fari" estas la kutima traduko de la angla "to do". Tamen, "do as I say" kutime signifas "agu laŭ miaj postuloj kaj ordonoj". "Do" havas vastan signifon en tiu frazo, kiu ne tute kongruas kun la signifo de "fari". Laŭ mia vidpunkto, "agi" pli bone spegulas la senton de ordonoj kaj postuloj, kiujn la angla frazo indikas.

Tamen, mi pretas akcepti kontraŭan opinion. Diru pli, mi petas.

"Agi" estas multe pli proksima al la angla "to act". "Agi" estas io konscia, kaj la adverboj ligitaj al ĝi estas plej ofte de la tipo "prudente, honeste, malbone, singarde, arogante, humile, admirinde...", aferoj ligitaj al la intencoj aŭ ŝajnaj intencoj de la aganto kaj oni eble ne ofte pensas pri objekto de la ago. Ĉe la vorton "fari" aperas ofte alia, pli simpla tipo de maniero, pli konkreta, ekz. "rapide, per la maldekstra mano, uzante ŝraŭbilon..."

Mi ne klopodas krei logikan difinon de la vortoj, nur priskribi lingvan senton. Eble vi trovos ion en vortaroj.

La Angla frazo povas havi ankaŭ tre simplan interpreton, sen ia ajn "kiel"-eco. Ĝi povas esti proksimume samsignifa kun "Vi devas obei min!", ĉu ne?

Se vi sentas alie, simple malatentu mian konsilon.

Dankon, ondo. Mi plene konsentas ke la signifo estas "Vi devas obei min!". Foje mi preferas resti pli proksima al la strukturo de la originalo. Sed ne malofte, la plej bona traduko de la signifo uzas malsaman strukturon. En la nuna kazo, mi opinias ke vi trafis superan tradukon, kaj via sugesto plej bone kaptas la senton de la angla versio. Do, mi ŝanĝos al via propono.